الخميس، 10 يوليو 2014

الشقة من فلوس الزوجة



الشقة من فلوس الزوجة
من تلات اواربع سنين جاتنى جلطة بقيت انسى الكلام ، كنت قدمت على شقة وانا فى الشغل وبعدين انا اتجوزت ،جوزى او لما اتجوزت قدم هو على طلب شقة فى اسوان احنا اصلا من كوم امبو،انا قدمت على شقة كمان وانا كنت شغالة فى المديرية وبعدين نظرا لظروف الصحية انا قدمت فى مركز شباب فى كومومبو
ومرة اصحابى بيقولوله ان مراتك خلاص قربت تمشى من المركز وهاتسيبنا وتمشى فقالهم عليا الطلاق ماهتمشى غيرت لماتكتبلى الشقة والشقة لماطلعت باسمى قالى اعملى تنازل عن الشقة وان هو اسمه لسة ما اتسجلش فى المجلس وراح مجلس المدينة عمل مشاكل كتير بالمجلس علشان التنازل بس مانفعش
وراح لابويا وقاله بنتك لو ماعملتش تنازل ليا عن الشقة ماتلزمنيش رغم ان معظم الفلوس بتاعت الشقة انا اللى دفعاها من مرتبى ، وكمان زمايلى فيهم قرايبى نصاحونى كتير قالولى اوعى تعملى تنازل عن الشقة ، وعلى فكرة ولا كان عندى ضغط ولا سكر ولا اى حاجة انا كنت كويسة وزى الفل .
بس بسبب ضغط المشاكل اللى انا فيها جاتنى جلطة وجنبى الشمال كله توقف ،بس هو فيه حاجة كويسة هو عالجنى وكل حاجة وعلى فكرة هو حس بالذنب اللى عامله بس هو احساسه بعدم الامان انه لمايجى بتاع النور ،الكهربا او بتاع الميه ويلاقى العقد بأسمى ، وانا قولتله مفيش فرق بينا ، وانه فى اى لحظة ممكن يمشينى انا واولادى لو فكر يتجوز واحدة تانى ..
وكمان حتى لو اتجوز انا المحمكة هتحكملى بالشقة لانى انا اللى حاضنة ،وكذا مرة اطلب الطلاق ، وكنت ببكى وحالتى النفسية كانت صعبة جدا وبقت وحشة جدا وجاتنى موضوع الجلطة .
مضربنيش ولا مرة بس اللى بيضايقنى قوى الصوت العالى ،وهو صوته عالى وبيزعق على طول هو صوته كدا معايا وكل مايخطر على بالك من الفاظ وحشة كان بيقولها ،حتى العيال بقوا زى ابوهم وكدا ، والولد الكبير بقى يشتم زى ابوه ، ولما اخوه الصغير يساعدنى فى شغل البيت كان بيقوله يابت انت زى البنات بتساعد  امك فى شغل البيت ، وكنت اقوله انت اللى بتعمله ده غلط بس ماكنش بيسمع كلامى خالص .
وبالنسبة لموضوع الطهارة ، انا بنتى ما تطهرتهاش ، وكمان معاها بنت عمتى الكبيرة متجوزة واحد دكتور راح شكر ام مراته علشان مطهرتش بنتها اللى هى مراته.
ومعانا بنات كتير فى العيلة  كمان ماطهروش  بناتهم خلاص ، وانا فاكرة ايام زمان صعبة بصراحة بس عادات وتقاليد بقى هنقول ايه .
لغاية دلوقت  واحنا برضوا على نفس الحال كل يوم يتفتح الموضوع على الشقة فانا قولتله انت لو اتجوزت اروح فين وانا واولادى يسكت يسكت ويفضل يزن تانى على دماغى .
وعلى فكرة فى كتير حواليا بيتخانقوا وبيحصل اكتر من كدا وده بيرجع للست ،انا لو عودت جوزها بيكرر الموضوع مرة واتنين وتلاتة وعشرة .اهم حاجة بين المتجوزين  التفاهم والست  هى اساس كل شى على فكرة ،ولو اتمادت فى اى حاجة بيبقى الست هى السبب وده غلطتها وانا اتحملت كتير بصراحة وانا اللى ادته الفرصة للاهانة والصوت العالى لو كنت وقفت من الاول وقلت للناس ماكنش ده حصل .
ومن الاخر الست هى اساس كل شئ واحنا فى بيتنا احنا متفقين ان الصوت العالى هو اساس كل المشاكل على فكرة .
واخويا من الاول قالى مادام هو صوته عالى يبقى ماينفعش على فكرة بل بالعكس الصوت العالى هو اساس المشاكل وانا اتحملته والحمد الله هو طبعه كدا مش هيتغير وبيرد على العيال ويقولهم انا طبعى كدا.
احنا احسن من غيرن اعلى فكرة بكتير جدا ، فى ناس بتتضرب وناس بتتخانق .
انا معايا بكاليوريوس تجارة ،بس انا بعد موضوع الجلطة وضعف الشعيرات الدموية بتاعت المخ بقيت انسى كل حاجة وهو بقى يتحجج بالنسيان ده ويخدعنى وانى كلامى مش مفهوم وانتى بتقولى اييييه بتقولى ايييه وده كان مأثر فيا كتير على فكرة ، مع انى انا سألت لااصحابى انتوا فاهمين انا بقول ايه ،كانوا يقولولى ايوة احنا فاهمينك كويس قوى على فكرة .
وهو بيصرف على البيت وبيجيب كل حاجة وانا بقالى 8سنين متجوزة وانا ليا 15 سنة بشتغل على فكرة .
وومشيت من مركز شباب فى كوم امبو   لمركز شباب فى اسوان وجاتنى الشقة بتاعتى فى اسوان وهو برغم شغله فى كوم امبو ،كان بيروح ويجى ،والمخاوف الكتير ان الشقة كانت باسمى وكان عايز يكتبها بأسمه وانا كنت خايفة انه ممكن بعمل محضر فى القسم بما انه محامى ويقدر يعمل اى حاجة هو اللى كنت خايفة منه والله وهو لوعايز يتجوز علشان المرض اللى انا فيه كان عملها وانا قولته لو عايز تجوز اتجوز بس انا مش مقصرة معاه فى حقوقه الزوجية بس بسبب التعب اللى انا كنت فيه مكنتش بقدر اديله حقوقه كلها وهو كان بيذلنى ويقولى اهو ما انتى مش عايزة تدينى حقوقى كلها وكل ما كان بيطلبنى يقولى لا خلاص انتى مش قادرة وانا كنت بضايق، لانى مش عارفة اديله حقوقه كلها وانا بقوله انت عايز ايه وبقيت اقول بص معلش علشان ظروفى الصحية انا مش قادرة اديلك حقوقك كلها .
وانا لما جاتنى الجلطة ابنى الصغير كان عنده سنة ونص بس كنت قايمة اشوفه عايز ايه فوقعت ورجلى الشمال اتكسرت كمان فجبست رجلى فترة وهو لما كانت بيعوزنى للمعاشرة كنت اقوله معلش انا تعبانة ، مع انه من المفروض انه يقدر اللى انا فيه وكان كأنه بيعاندنى بس انا مش عارفة هو بيعمل كدا ليه علشان بقى يطلبنى كتير ، وهو كان ديما محبطنى ومخلينى مكتئبة بصراحة حاجة صعبة جدا وانا مش فاهمة بصراحة ولا فاكرة هو بيعمل كدا ليه مع انى مش فاكرة حاجة انه فعلا قبل الجلطة كان بيطلبنى كتير ولا ايه .
وانا اللى كان  مأثر فيا خالص انه كان بيقولى انتى بتقولى ايه مش فاهمينى مع انه اصحابى فى الشغل كانوا فاهمينى خالص ، واولادى اتعودوا على سب الدين زى ابوهم وكل ما اقولهم حرام عيب كانوا يقولولى مش بابا بيقول كدا .
احنا ماقعدناش فترة  خطوبة انا وهو المدير بتاعى بس هو مش كبير قوى على فكرة ، بس هو فى الاول ولاخر نقول نصيب . 

ليست هناك تعليقات:

إرسال تعليق